Ikipe y’Igihugu y’Abagore muri Basketball ikomeje kwitegura imikino y’amajonjora y’ibanze y’Igikombe cy’Isi igiye gukomereza imyiteguro muri Mali, aho izanakina imikino ibiri ya gicuti.
Iyi kipe imaze iminsi itangiye kwitegura imikino y’ijonjora ry’ibanze yo gushaka itike y’Igikombe cy’Isi mu Bagore (FIBA Women’s Basketball World Cup 2026 Pre-Qualifying Tournaments), iteganyijwe kubera i Kigali kuva tariki 19 kugeza 25 Kanama 2024 muri BK Arena.
Biteganyijwe ko iyi kipe izahaguruka mu Rwanda yerekeza muri Mali tariki ya 7 Kanama. Izahakina imikino ibiri ya gicuti, aho uwa mbere uteganyijwe tariki 9 Kanama na 11, mu gihe izagaruka mu Rwanda ku ya 13 Kanama 2024, mbere y’icyumweru ngo irushanwa nyirizina ritangire.
- Advertisement -
Iyi kipe iheruka gukina umukino wa gicuti yatsinzemo iya Kepler WBBC amanota 80-44.
Muri iri rushanwa, u Rwanda ruzakira itsinda rya gatatu n’irya kane, aho ruri kumwe Great Britain, Argentine ndetse na Lebanon.
Umukino wa mbere uteganyijwe tariki 19 Kanama 2024, u Rwanda ruzakina na Lebanon, uwa kabiri na Argentine, mu gihe ruzasoza rwisobanura na Great Britain kuwa 22 Kanama 2024.
Iyi mikino yo gushaka itike y’Igikombe cy’Isi (FIBA Women’s Basketball World Cup 2026 Qualifying Tournaments) izitabirwa n’amakipe 24 arimo abiri yavuye i Kigali na Mexique ndetse n’andi 22 azava muri FIBA Women’s Continental Cups izakinwa mu 2025.
Muri aya makipe, agera 16 ni yo azitabira imikino y’Igikombe cy’Isi kizabera mu Bugade tariki 4-13 Nzeri 2026.
