APR FC yatsinzwe ibitego 2-0 na Simba SC umutoza wa yo yongera kwibazwaho impamvu adaha umwanya uhagije abanyamahanga baguzwe.
Abakunzi ba APR FC bakomeje kwibaza niba abakinnyi b’abanyamahanga baguzwe batari ku rwego cyangwa niba umutoza abatinyisha cyane ko batarahabwa umwanya ngo babanze mu kibuga, bari biteze kubabona ku mukino wa Simba SC ariko uretse Seidu Dauda nta wundi wabanjemo.
APR FC yari yagiye muri Tanzania gukina umukino wa gicuti na Simba SC mu rwego rwo kuyifasha kwizihiza ibirori ngaruka mwaka yise Simba Day yerekaniramo abakinnyi iba izakoresha muri uwo mwaka w’imikino.
Ni mu rwego kandi rwo gufasha APR FC kwitegura umwaka w’imikino wa 2024-25 by’umwihariko CAF Champions League izahuramo na Azam FC mu ijonjora ry’ibanze.
- Advertisement -
Igice cya mbere cy’umukino APR FC yarushijwe na Simba SC yaba mu kibuga hagati ndetse n’abakinnyi nka Niyomugabo Claude, Mugisha Gilbert ntabwo bahiriwe n’iki gice.
Gusa nta mahirwe afatika Simba SC yaremye uretse penaliti yabonye ku munota wa 42 ku ikosa ryari rikozwe na Seidu Dauda ariko itewe na Mkwala ayikubita igiti cy’izamu. Amakipe yombi yagiye kuruhuka ari
0-0.
APR FC yatangiye igice cya kabiri ikora impinduka, Victor Mboama na Mahamadou Lamine Bah bavuyemo hinjiramo Mamadou Sy na Ndayishimiye Dieudonne.
Ku munota wa 46 Simba SC yahise itsinda igitego ku ishoti rikomeye Debora Fernandez yatereye inyuma y’urubuga rw’amahina umunyezamu Pavelh Ndzila ayoberwa uko bigenze.
Ku munota wa 57, APR FC yongeye gukora impinduka Seidu Dauda avamo hinjiramo Taddeo Lwanga.
Muri iki gice cya kabiri wabonaga APR FC yahangayitse cyane ndetse n’izi mpinduka yakoze ntacyo zayifashije kuko Ahubwo Simba SC yayicurikiyeho ikibuga.
Byaje gutuma inabona igitego cya kabiri cyatsinzwe na Edwin Balua kuri kufura yo ku munota wa 67 ku ikosa ryari rikozwe na Mugisha Gilbert.
Darko Nović ukomeje gushyira abantu mu rujijo bibaza impamvu abanyamahanga bashya baguzwe badakina nka Godwin Odibo na Chidiebere Nwobodo Johnson ndetse n’impamvu atabanza Lamptey, yahise azanamo uyu munya-Ghana Richmond Lamptey asimbura Niyibizi Ramadhan.
Ku munota wa 80 APR FC yakoze izindi mpinduka 2, Byiringiro Gilbert na Mugisha Gilbert bavuyemo hinjiramo Godwin Odibo na Tuyisenge Arsene.
APR FC yagerageje gushaka igitego cy’impozamarira ariko kirabura umukino urangira 2-0.
