Niyonshuti Hakim Mubarak, umuhungu w’Umugaba Mukuru w’Ingabo z’Igihugu, Gen. Mubarakh Muganga, wari umaze imyaka ine muri APR FC, yasinye amasezerano y’imyaka ibiri muri AS Kigali.
Uyu mukinnyi yakuriye mu makipe y’abato ya APR FC ariko muri iyi mpeshyi yagaragaje ubushake bwo guhindura ikipe bityo akaba yajya aho azabona umwanya uhagije wo gukina.
Niyonshuti yaherukaga kugaragara mu mukino wa gicuti, Vision FC yatsinzemo AS Kigali ibitego 2-1, aho yakiniraga iyi kipe y’i Nyamirambo.
- Advertisement -
Nyuma y’iminsi mike yagiye muri AS Kigali ndetse yanifashishijwe mu mukino iyi kipe yatsinze Gorilla FC ibitego 2-1 mu cyumweru gishize.
Uyu mukinnyi yiyongeraho abandi bashya bagiye mu Ikipe y’Umujyi nka Nkubana Marc, Hakizimana Felicien, Rwabuhihi Placide, Onyeabor Frankin, Aboubakar Saidi, Nshimiyimana Tharcisse na Ngendahimana Eric.
AS Kigali izatangira Shampiyona isura Kiyovu Sports ku wa Gatanu, tariki 16 Kanama 2024 saa 15:00 kuri Kigali Pelé Stadium.
