Amakipe ya APR VC yegukanye Shampiyona ya Volleyball

Nyuma yo gusoza shampiyona isanzwe ku mwanya wa kane kuri APR y’abagabo n’uwa mbere kuri APR VC y’abagore, amakipe yombi yaje kujya gukina imikino ya kamarampaka atari yo ahabwa amahirwe gusa aza kwitwara neza mu mikino ya ½ aho APR VC y’abagore yasezereye Rwanda Revenue iyitsinze imikino 2-0 na basaza babo bagatsinda REG VC gutyo.

Ku mikino ya nyuma APR VC y’abagabo ikaba yaratangiye itsindwa na Kepler maze na bashiki babo batsindwa na Police umukino wa mbere. Bukeye bwaho kuwa Gatandatu APR WVC yigaranzuye Police WVC iyitsinda Seti 3-2 mu gihe bigoranye na APR VC nayo yatsinze Kepler Seti 3-2.

Izi ntsinzi z’aya makipe yombi zikaba zongeye gusa ubugira gatatu dore ko ikipe ya APR WVC yaje gutsinda Police WVC seti 3-1 (27-25, 26-24, 14-25, 29-27) na ho mu bagabo na bwo APR VC itsinda Kepler Seti 3-1 ( 25-19, 25-23, 22-25, 29-27).

APR WVC ikaba yisubije igikombe nubundi yari yarambuwe na Rwanda Revenue umwaka wa shampiyona ushize mu gihe APR VC y’abagabo icyambuye Gisagara VC yari igifite ihita itwara irushanwa yaherukaga mu myaka itatu ishize.

Iyi mikino ya nyuma ikaba yabanjirijwe no guhatanira umwanya wa gatatu aho ikipe ya REG yaje gutsinda Police Seti 3-0 (25–19, 25-16, 25-20), yegukana umwanya wa gatatu itsinze ku mikino 2-1.

Mu bagore uyu waje gutwarwa n’ikipe ya Rwanda Revenue Authority yari ifite igikombe giheruka aho yo yari yatsinze Ruhango imikino 2-0.

Uretse igikombe, amakipe yatwaye igikombe akaba yahawe na sheke ya miliyoni ebyiri z’amafaranga y’u Rwanda iza kabiri zihabwa miliyoni imwe n’igice na ho izabaye iza gatatu zinaherekereshwa Miliyoni y’amafaranga y’u Rwanda.

Umwaka w’imikino wa Volleyball ukazakomereza kuri Memorial Rutsindura izabera mu ntara y’Amajyepfo i Huye mu ntangiriro z’ukwezi gutaha kwa Kamena.

APR VC yegukanye igikombe cya shampiyona itsinze Kepler ya Nyirimana Fidele

Abarimo Karekezi Leandre wayoboye FRVB, Raphael Ngarambe uyiyobora na Nathalie Munyampenda uyobora Kepler bakurikirana imikino yanyuma

Clapton Kibonke n’umunyamakuru wa IGIHE Emmy bari baje kwihera amaso Volleyball ikinwa

APR WVC yishimiye kongera kwegukana shampiyona ya Volleyball

Umutoza wa APR WVC yashimye Imana nyuma yo gutwara igikombe

APR VC y’abagabo n’iy’abagore baherukaga gutwarira ibikombe rimwe muri Covid

Ikipe ya APR VC ntabwo yari mu zihabwa amahirwe ubwo shampiyona yatangiraga ariko yaje kwihagararaho

Kepler yari ifite abakunzi benshi yegukanye umwanya wa kabiri

Ikipe ya REG ifite igikombe cya 2022 yatahanye umwanya wa gatatu