Kapiteni w’ikipe ya Arsenal Pierre-Emerick Aubameyang yaraye ashyize umukono kuri kontaro nshya y’imyaka itatu akinira iyi kipe yo mu majyaruguru y’umujyi wa London.
Uyu Munya-Gabon w’imyaka 31 y’amavuko, yageze muri iyi kipe mu kwezi kwa mbere mu mwaka wa 2018.
Mu mwaka we wa mbere w’imikino wa 2018-2019, yegukanye igihembo cy’urukweto rwa zahabu (Golden Boot) cy’uwatsinze ibitego byinshi kurusha abandi muri Premier League.
Yagize ati: “Gushyira umukono kuri kontaro yo gukinira iyi kipe idasanzwe nta na rimwe nigeze mbishidikanyaho. Nemera Arsenal. Dushobora kugera ku bintu bikomeye twese hamwe. Dufite ikintu gishimishije hano kandi nemera ko ibyiza biri imbere kuri Arsenal.”
- Advertisement -
Kontaro Aubameyang yari asanganywe muri Arsenal yari kurangirana n’umwaka w’imikino wa 2020-2021, bivuze ko guhera mu kwezi kwa mbere yashoboraga gutangira kuganira n’andi makipe.
Gushyira umukono ku masezerano mashya byashimishije cyane abafana ba Arsenal henshi ku isi, bakunze kumubonamo umukinnyi ubibutsa Thierry Henry na we wabaye kapiteni w’iyi kipe.
Henry, ubu utoza ikipe ya Montreal Impact muri Canada, yakiniye Arsenal imikino 377 ayitsindira ibitego 228 mu myaka umunani.
Kuva yagera muri Arsenal – aguzwe miliyoni 56 z’amapawundi yari yo ya mbere menshi iguze umukinnyi, Aubameyang amaze kuyitsindira ibitego 72 mu mikino 111 mu marushanwa yose.
Ibi bituma bamwe babona ari mu nzira nziza atera ikirenge mu cya Thierry Henry, mu gihe yagumana n’iyi kipe indi myaka myinshi.
Uyu rutahizamu yatsinze igitego mu mukino Arsenal yatsinzemo Fulham ibitego 3 – 0 ku wa gatandatu ushize, wari umukino ufungura uyu mwaka mushya wa Premier League.
Yanatsinze ibitego bibiri mu mukino wa nyuma w’igikombe FA Cup wo mu kwezi kwa karindwi ubwo Arsenal yatsindaga Chelsea 2 – 1, bikayihesha itike yo gukina imikino ya Europa League mu mwaka utaha.
Umutoza Mikel Arteta wa Arsenal yagize ati: “Byari ingenzi ko Pierre-Emerick agumana natwe. Ni umukinnyi mwiza cyane utekereza bitangaje. Kuba ari umukinnyi wakoresheje igihe gito cyane ngo ageze ku bitego 50 muri iyi kipe bikubwira buri kintu cyose ucyeneye kumumenyaho n’uburyo akoramo.”
Akomeza agira ati, “Ni umuyobozi w’ingenzi w’ikipe kandi ni inkingi ikomeye y’ibyo turimo kubaka. Arashaka kuba mu bakinnyi beza cyane ku isi akagira icyo asiga agezeho azibukirwaho. Ibyo ashobora kubigeraho ari hano muri Arsenal.”
Uyu wabaye umukinnyi warushije abandi mu mupira w’amaguru muri Afurika mu 2015, yagizwe kapiteni wa Arsenal mu kwezi kwa 11 mu 2019, asimbuye Umusuwisi Granit Xhaka wari ukuweho na Unai Emery watozaga Arsenal.
Kuri iyi mpeshyi, Arsenal yaguze myugariro Gabriel Magalhaes wo muri Brazil kuri miliyoni 26 z’ama-euro imukuye muri Lille, inagura Willian wigeze kuba akinira Chelsea ariko utari ugifite ikipe.
Yanagaruye Dani Ceballos ukina hagati mu kibuga, yari yaratije mu ikipe ya Real Madrid.
